SATARKA hondarribiako olerkaria

Klaudio Sagarzazu "Satarka" (1895-1971) Hondarribiak emandako olerkari-poeta haundia izan zen. 2 liburu argitaratu zituen bizi-artean, Txinpartak (1922) eta Intza begietan (1957). Gerora hondarribiko udalak Ezti-tantak (1996) argitaratu zion, jaiotzaren ehungarren urtemugaren ospakizunen karietara.

Olerkari herrikoi eta sentibera zen, metafora sotilen zalea, eta ezagutza haundia lortu zuen, batezere lehiaketa ugaritan saritua izan zelako. Bere poesia oso lotua zegoen naturarekin: lore, txori eta urtaroei abestu zien.

1919an hasi zen poemak idazten, han hemenka argitara emanez. Jakintsu desberdinek Xabier Lizardiren bidean kokatzen dute, bere gaiak eta poesiaren soiltasunari erreparatuz. Hondarribi inguruko jendeari, gainera, oso atsegina egingo zaigu gure hitzak erabiltzen dituelako, eta hondarribiko esapideak.


UDABERRIKO GAUEAN

Udaberriko
gau zoragarrian,
lagunik gabe
Ai! bakar-bakarrik
zelaian nago,
loretxo-artean.

Ortze ederrean
illargi betea...
illargiaren
ondoan izarrak...
udaberriko
gau zoragarria!

Udaberriko
gau zoragarrian
ortze ederrean
egon nahi nuke nik
ilargiaren
urbil, izarrak lez.

Mendi-aldetik
samur dator ura,
ta zubiaren
azpitik dijoa,
guztiz urruti...
aruntz, itsasora.